離開15分鐘折返受訪

【明報專訊】港澳辦主任王光亞噚日喺北京接見特首梁振英後接受記者採訪，如果大家有留意，王主任係喺大街上接受提問，點解呢？有記者耳語，王主任應該係一早有嘢想講，所以行出港澳辦見記者。


港澳辦曾話「唔落街」

王光亞有話說，呢個說法未必無理據。記者留意到，梁振英同佢會面後，港澳辦人員派人來放風，話王主任唔會「落街食飯」，結果大部分記者喺門外等咗一段時間就走，點知無耐王主任突然行出嚟，而有線電視記者仲喺度搞緊採訪工作，所以捉到佢做訪問。


香港其他傳媒見到王光亞直播訪問出街，即刻打電話畀北京嘅同事，叫佢哋趕返港澳辦，但王主任已經走咗。不過，唔知王主任有心定係無意，喺離開後15分鐘內折返，見到一眾記者在場，又停下接受多次訪問。


梁振英噚日喺港澳辦時，王主任全程無現身，梁到場由港澳辦副主任徐澤迎接，梁振英離開時王光亞亦無現身送行。梁振英噚晚突然改早一班機返港，記者問佢點解，佢就話要「返去勤力做嘢」！