新聞類別
財經
詳情#
【明報專訊】創興銀行（1111）賣盤後身價激增，噚日開股東特別大會，吸引大批小股東同記者齊齊相聚創興銀行中心。
但似乎公司未適應接待咁大批人，結果小股東要喺樓下排長龍排十幾分鐘至上到去開會，記者就喺門口「寒風凜凜」之下守候。
為售創興銀行中心投票
噚日創興銀行同廖創興企業（0194）嘅股東會前後腳開，喺等待入場嘅過程中，由於會場場地不足，廖創興企業嘅小股東，喺樓下排起蛇形隊，默默等咗十幾分鐘至上到樓。
至於創興銀行嘅股東特別大會主要係為出售創興銀行中心大廈投票，會後小股東落樓面燶燶，話公司好多問題都答得好模糊，例如棟物業具體嘅估值方法，最清楚答案嘅大廈核數師噚日無露面，由法律顧問代答，「基本上就答唔出」。
賣產問極答唔出 小股東面燶燶
有小股東表示，覺得物業估值過低，「驚拖累個股價又跌番落嚟！」而創興賣盤畀越秀單deal究竟幾時可獲金管局批准，小股東話公司只係重複金管局三個月批核期限，而目前已經過咗個幾月，但仍未公布決定。唯一令小股東期待嘅，就係創興快快趣賣咗物業，個特別股息就可以「袋袋平安」啦！
email: piano@mingpao.com
[小琴密語]
回應 (0)
