DBC啟播 黃楚標攜妻女現身

【明報專訊】DBC電台7條頻道噚日舉行啟動典禮，主席李國章、大股東黃楚標、董事李少光都係政界中人，所以好多嘉賓到賀，有經民聯監事會主席林建岳、主席梁君彥、副主席林健鋒，前政務司長唐英年，東亞銀行主席李國寶等到賀。李國章致辭時話，DBC投資咗2000萬，為全港的士小巴免費安裝數碼收音機，估計到月底，單係的士、小巴，每日可以接觸到100萬客。


呻無錢買亞視

雖然黃楚標無上台，但呢個大股東噚日係另一個焦點，有記者問佢會唔會考慮買亞視，佢耍手擰頭say no，話自己無錢買。為人低調嘅佢，噚日罕有帶埋太太同9歲囡囡到場，阿女見到咁大場面都無怯場，亦肯同記者傾吓偈。


積極推前財爺梁錦松選特首嘅前商務及經濟發展局長馬時亨亦有到場，不過佢好低調，唔肯再講梁錦松係咪選特首。至於會唔會幫DBC開咪，馬時亨就笑言「唔會」，因為仲未傾掂人工咁話喎。