調查：消費信心微升仍弱

【明報專訊】聖誕同新年係傳統消費旺季，不過民建聯嘅「消費者信心指數」調查發現，今年消費者信心雖然比去年底輕微回升，但仍然疲弱，以100分為中性，只得64分，仲有成50.5%受訪者話過去一年財政狀况轉差，唔知會唔會影響市民買禮物嘅意欲呢？民記呢個調查以美國密歇根大學嘅同類調查為藍本，自2004年起開始進行，每半年一次。佢哋喺今個月初以電話訪問咗841名市民，發現市民無論今年定預期明年消費信心都屬於較負面，預測來年消費者信心嘅預期指數有70.3分。


至於同消費者信心息息相關嘅經濟前景預測，民記就話受訪市民今年較以往樂觀，不過只得14.4%受訪者認為來年經濟會好轉，有49.9%人持負面看法，但仍然比年中調查嘅54%人感負面嘅歷史新低稍稍回升。立法會議員兼民建聯經濟事務發言人葛珮帆話，政府應推出紓解民困、退稅及降低薪俸稅等措施。