財爺財案片 盼網民「招呼」

【明報專訊】財爺曾俊華又搞咗一輯財政預算案宣傳片，但今年或令網民失望嘅係，今次以動畫短片代替真身，要惡搞佢就難啲，難怪財爺喺網誌上「挑機」話，「很期待看到我們今次推出的十條短片，會被網民怎樣『招呼』」，睇嚟網友要多花心思先可以搞到「二次創作」。Emily畀個貼士大家，片中不斷強調要儲錢同有備無患，除咗一隻大豬仔錢罌，連一粒糖都見唔到，大家明白啦！


動畫代真人 盼改八股宣傳

財政預算案宣傳片一向都係網民「惡搞」嘅材料，2010年嗰輯曾被網民「二次創作」，變成「曾俊華回魂夜版本」。不過，噚日財爺喺網誌話，擔心宣傳片如果以八股方式表達，會變成「票房毒藥」，所以今年就製作動畫。佢仲話「今次毋須『粉墨登場』……我雖然不懂得『改圖』、重新配音或改字幕，但我平日在YouTube上亦見識過各路高人的大作，很期待看到我們今次推出的十條短片，會被網民怎樣『招呼』」。


變身Johnny 首集強調儲錢

第一條短片《有備無患》大約長1分鐘，片中主角係變咗Johnny（財爺洋名係John！），不斷強調儲錢同有備無患嘅重要，話政府收入唔穩定，仲講番SARS前後幾年經濟唔好，如果無咗儲備邊搞得掂喎。短片不停咁強調儲錢，唔通係想降低大家期望？不過，點解財爺唔提家財政儲備已經去到7339億元呢？


其餘9條短片會隔日上載，大家可以去「Johnny財政博客」嘅YouTube頻道（http://www.youtube.com/user/johnnybudget1314）睇吓。