兩女將或南區夾擊 單仲偕無信心

【明報專訊】繼油尖旺區議會京士柏補選後，來年又再有區議會補選激戰，東涌北區同南區海怡西都有議席出缺。Emily收到風，公民黨一名年輕大狀約半年前「下降凡間」喺東涌服務，佢就係公民黨東涌地區發展主任、30歲出頭嘅余俊翔（Peter）。佢近半年密密喺區內同街坊打交道，唔知會唔會有機會出選遲吓嘅區議會補選呢？


補選前夕 公民新丁落東涌

離島區議員林悅早前因為提交虛假文書被判罪而將會失去議員資格，相信唔少政黨都對東涌北區嘅議席虎視眈眈，近日東涌街頭會見到公民黨橫額上，有余俊翔拍住立法會議員郭家麒嘅照片。根據泛民內部協調機制，如果有補選，公民黨可以優先派人出選，唔知余俊翔有無機呢？


另外，由於前南區海怡西區議員馮煒光去咗做新聞統籌專員，所以遲吓又會有補選。人民力量主席袁彌明話積極考慮參選，佢近日頻頻落區認識街坊，仲積極拉攏前民主黨議員鄭家富支持。泛民協調後，考慮派出民主黨副主席單仲偕出戰。單仲偕同袁彌明對碰，加上新民黨對手陳家珮，兩個靚女夾擊單仲偕，「單雞」都話無咩信心會贏，不過就話「無理由將個位畀新民黨」。