林鄭NG片曝光

【明報專訊】為咗推銷政改，政改三人組政務司長林鄭月娥、律政司長袁國強同政制及內地事務局長譚志源罕有粉墨登場，拍咗段宣傳片，邀請全港700萬市民同佢哋一齊實現願景落實普選，唔少人都話呢一系列宣傳似幫林鄭備選特首多啲，原來林鄭為咗拍呢段片，當日朝早6點幾就準備拍攝，而且有NG！

晨早6點幾準備政改片

原來呢段30秒嘅宣傳片係喺11月中一個星期六拍攝，噚日政府就喺YouTube放咗段1分鐘宣傳片嘅拍攝花絮。咪睇林鄭平時發言淡定唔使點睇稿，佢拍攝當日都好緊張咁，花絮仲特登剪咗林鄭NG片段出嚟，原來「好打得」嘅林鄭都有NG時。


袁國強讚譚志源鬼馬

至於3個司局長邊個表現最好？袁國強就話應該係譚志源，事關佢夠鬼馬，不過，譚志源就話同兩個司長一齊拍宣傳片壓力大啲！