田少辣㷫岳少

【明報專訊】自由黨同特首梁振英嘅關係，真係好似近日嘅天氣咁——冷！田北俊日前喺電台開火，鬧梁振英委任「梁粉」做旅發局、房委會等機構主事人，呢番話咁就燒埋其他人喇。接替田北俊任旅發局主席嘅林建岳雖然去咗日本度假，但佢接受查詢時都忍唔住話，「自己對出任旅發局主席一職冇政治目的，只係希望能夠為香港人服務」。其實，岳少同去年參選特首嘅唐英年份屬老友，選舉過後，佢又同一班「唐營」人士成立經民聯，做咗支持政府嘅建制派，所以話，邊個係「梁粉」、「乜粉」，有時都好難界定嘅！


林建岳﹕掌旅局只為服務

田北俊就暫時擱下是非，同孫仔去歐洲滑雪，佢喺facebook話，今年真係好彩，呢幾日歐洲藍天白雲，遍地白雪，啱晒滑雪喎。佢仲祝大家聖誕快樂，似乎未受近日政治爭拗影響玩樂心情。