天文台自製節目教冷知識

【明報專訊】噚日開始，市民可以透過手機天文台App收睇高清天氣節目喇。天文台高級科學主任宋文娟（Sandy）話，為咗與時並進，天文台決定自家製作，特別成立一隊有14名科學主任嘅團隊，星期一至五每日分上下晝拍攝《天氣廣播站》節目，並上載YouTube，等公眾有更多渠道接觸天氣新聞。


YouTube有得睇

Sandy話，早喺8月天文台已開始構思拍攝節目，有別於以往喺電視新聞報道天氣，YouTube節目時間較長，一般有兩分鐘，逢周五更會加插「氣象冷知識」環節，節目會有成4分鐘，介紹更多氣象相關知識。


節目除咗有7日天氣預報，仲會加插衛星雲圖、氣壓圖等，市民可記住天氣變化。主持人用語會更「日常化」，深入淺出介紹更多資訊，例如噚日第一集就介紹冬季季候風，Sandy話，「呢啲名詞大家成日聽，但究竟知道幾多呢？我哋就希望講到大家容易啲理解」。


為咗籌備節目，天文台已upgrade攝錄器材，並安排主持接受「培訓」，等佢哋面對鏡頭時可以更習慣同「親切」，令節目易啲入屋。節目除咗喺YouTube播放，亦會統一發放畀各電視台。