習近平食包 全聚德無端炒起

【明報專訊】有時候真係不得不佩服內地股民，原來除咗領導發表重要講話可以影響股市，佢哋食乜都一樣可以係炒作信號。上星期六國家主席習近平微服出巡，去咗北京一間叫慶豐包子舖嘅老字號食包（圖），經過媒體大肆宣揚，第二日果間包子舖立即吸引唔少食客慕名而至，大家齊齊叫返習大大（網民對習近平嘅暱稱）食過嘅包，半日之間舖頭已經做咗平時一日嘅生意額。而呢個情况竟然畀股民嗅到機會，認為可以炒一炒「包子概念股」。


於是，噚日響內地上市嘅全聚德開市之後好快就係咁升，事關班股民話，嗰間慶豐包子舖係由一間叫聚德華天控股有限公司所開，而聚德華天就係全聚德大股東，所以肯定炒得起云云。雖然好快就有媒體出聲澄清，話慶豐嘅母公司係華天集團，唔係聚德華天，前者係北京市西城區國資委旗下公司，同全聚德零關係，但係股民已經炒到眼都紅埋，結果全聚德咁就升到停板，真係無啦啦得益。


習大大食個包都可以左右股價，其實大家唔需要覺得太奇怪，事關今年4月，國務院總理李克強去四川視察地震災情，官方媒體發放咗佢響帳篷食早餐嘅相，眼利嘅股民見到總理用涪陵榨菜送粥，結果呢間上市公司一樣被炒高6%。


email: piano@mingpao.com

[小琴密語]