長毛講笑 話民建聯逼人投票

【明報專訊】社民連主席梁國雄（長毛）前日喺一個記者會中話，知道民建聯準備一條草案，建議喺2017年特首普選中，如果選民唔投票，就要罰500元。Emily聽到一個「咁爆」嘅消息，就搵民建聯葉國謙求證，點知阿謙一聽到就嬲爆咁話﹕「呢個係不負責任嘅講法，喺揑造！」長毛其後認衰，澄清呢個係黑色幽默，「只喺講笑」！


阿謙一聽到Emily嘅求證電話，就好緊張同斬釘截鐵咁話「民建聯絕對無咁嘅建議」。Emily後來再搵長毛求證時，佢就話呢個係黑色幽默，只係用嚟比喻如果大家唔為政改出聲，將來就有可能出現以上嘅情况。


其實，之前反佔中團體「幫港出聲」就曾經提出類似建議嘅「法定強制性投票」方法，建議透過立法以懲罰或獎勵方式強制選民投票，從而增加投票率，但就被學者批評可能會弄巧反拙。