元旦遊行 滿街「老翻」路福西

【明報專訊】每年嘅元旦遊行，都有唔少市民花盡心思設計服飾同道具表達訴求，令活動生色不少。今年最紅嘅可謂被人一擲成名嘅「路福西」狼公仔（前稱「路姆西」），除咗有人帶同佢嘅「真身」到場，又有政黨同團體整咗佢嘅「巨型版」放喺街站，仲有人豪花3500蚊製作全套路福西裝束著上身，吸引唔少人爭相合照。


花3500元「著上身」

今年遊行，有唔少市民覺得路福西呢隻狼公仔可以用嚟代表特首梁振英，令佢旋即成為新一代「民運代表」。噚日唔少政黨同團體包括社民連、民間電台等，都整咗個路福西巨型版放喺街站；77歲嘅曾婆婆亦唔輸蝕，拎住民主黨派發嘅紙摺路福西遊行，仲話希望有生之年可以見到真普選。


葉先生一家三口就因為之前買唔到公仔「真身」，索性為屋企另一隻狼公仔穿上紅色格仔恤、吊帶牛仔褲，扮成路福西咁樣，希望同行嘅6歲幼女唔使咁悶，亦希望用隻公仔解釋畀囡囡知，要透過真普選選出一個好特首，而唔係好似狼咁狡猾。


另外，讀設計學系嘅朱同學，花咗幾晚時間製作咗一個梁振英頭像，套喺路福西身上，果然創意無限。