蘇鑰機掃鮑魚麵非遊行

【明報專訊】元旦遊行及「和平佔中」喺維園音樂亭搞全民投票，兩者人數雖然唔算好多，但相當熱鬧，公民黨前立法會議員吳靄儀噚日12點幾就去咗音樂亭排隊投票，前政務司長陳方安生都有去投票，之後仲參加遊行，吸引唔少市民影相。


前全國政協委員劉夢熊上年七一喺銅鑼灣「路過」，噚日就名正言順用保釣行動委員會顧問現身為保釣行動站台。Dream Bear話保釣不分左中右，批評海事處租船監視保釣船啟豐二號，佢講完保釣亦贈梁振英（CY）兩句，「總之得民心者得天下，失民心者失天下」。


夢熊為保釣站台

免費電視發牌一事2013年搞到滿城風雨，藝人艾威同港視職工會主席楊志豪都有分頭現身遊行隊伍，曾留守政總嘅「港視十壯士」就另組「留守香港」出席，仲善用專業將市民心聲拍成短片。導演張同祖則批評CY喺處理牌照一事不知所謂，要求日後特首普選方法要無篩選、允許公民提名。


Emily去維園時，發現銅鑼灣同天后港鐵站貼滿前往工展會嘅指示，不過對遊行集合地點嘅指示就唔清晰；Emily喺Sogo門外，更見到中大新聞與傳播學院教授蘇鑰機拖住「一車」鮑魚麵，教授話佢係去工展會購物，唔會拉住戰利品去遊行。