遊行擺街站 密密吸金

【明報專訊】民陣舉辦元旦遊行，亦係各個民主派團體籌款嘅好機會，唔同團體嘅街站密集擺喺銅鑼灣至中環嘅街上。Emily覺得最落力籌款嘅係學民思潮，由銅鑼灣行到去灣仔，佢哋已經最少有5個籌款街站，市民亦好支持呢班學生，即使每個街站相隔唔係好遠，佢哋嘅錢箱都有好多紅衫魚甚至大牛，箱內亦有人民幣。


學民最少5個

「和平佔中」雖然只得一個街站，但吸金能力好高，20蚊一套postcard、100蚊一個環保袋亦不乏支持，市民幾乎係湧埋去塞錢入錢箱。


各政黨亦出盡心思爭取參加者支持，好似民主黨擺街站，就大派可以「摺出」路福西嘅卡紙，部分已經摺好嘅更令市民爭相去拎。公民黨除咗有主席余若薇、黨魁梁家傑嗌咪外，亦率先售賣年宵物品「抗狼公民三寶」，呢套文具套裝盛惠$68.9。


社民連亦用掟嘢嚟爭取市民捐錢，呼籲大家支持佢哋繼續抗爭，睇落成績都唔錯。民協就整咗個大鳥籠諷刺政府鳥籠政改。