台黃鴨復活唔見疤

【明報專訊】目前停留喺台灣、曾深受港人喜愛嘅黃鴨除夕突然爆炸，搞到黃鴨剩番「鴨皮」，無法度過1314，令唔少鴨迷失望。事隔3日，黃鴨「重生」，噚日朝早重現基隆海洋廣場水域，吸引大批人爭相拍照留念。


屁股開多兩窿免再爆

經過「手術」嘅黃鴨，充氣後回復番「眼仔碌碌」嘅可愛表情，完全睇唔到上次爆炸後留低嘅8米長「傷疤」。工作人員話，由於上月底基隆日日都係陰天微雨，除夕嗰日先至出現陽光，當太陽曬喺黃鴨嘅橡膠製充氣體上，加劇內外溫差，導致壓力變大，加上又無安置風扇控制充氣體內部壓力，最終黃鴨「捱唔住」爆炸。為咗確保黃鴨健健康康，工作人員喺黃鴨屁股開多兩個窿，原先4部鼓風機加多1部，以調節內部壓力，避免溫差變化令黃鴨再次爆炸。


活動發起人黃景泰話，黃鴨爆炸後，工作人員不眠不休日夜趕工，就係希望盡快令黃鴨重新「站起來」，帶畀鴨迷幸福快樂。


由荷蘭藝術家霍夫曼設計嘅黃鴨，舊年5月喺香港維港水域展出近一個月，12月21日喺台灣基隆亮相，計劃展出49日。