西九戲棚播女姐作品

【明報專訊】鍾意粵劇特別係已故粵劇名伶紅線女嘅朋友留意喇，第3屆西九大戲棚將於下周五（17日）至2月9日舉行，今年首度移師西九海濱長廊上演，當中年廿九同年三十晚有8場免費戲曲電影，特別放映兩套紅線女及馬師曾合演嘅作品《審死官》同《關漢卿》作悼念致敬，「女姐」迷萬勿錯過。
播《審死官》同《關漢卿》
大戲棚藝術策劃毛俊輝話，今年請到32名梅花獎藝術團名將，開幕頭4日上演京、崑等折子戲，緊隨有多名本地名伶粵劇演出，仲新增有14個粵劇新星喺最後兩日壓軸表演。
西九表演藝術經理鍾玉珍話，現時整體門票已售出65%，京劇折子戲同本地名伶羅家英主演粵劇《斬二王》場次更售出95%。佢話今年選址離鬧市較遠，大會喺尖沙嘴中間道同港鐵九龍站，每隔10分鐘安排一班免費穿梭巴士接載往返。
至於大戲棚就由著名建築師馮永基擔任空間設計，以雙竹搭建「大圓環」藝術裝置圍繞呈「大金鐘」形狀嘅戲棚 ，寓意大團圓，場內可容納850名觀眾，比去年多50個座位。舊年12月中起施工，現時已完成約六成。