特首北上終於要畀錢

【明報專訊】Emily上個月向特首辦同3司12局查詢佢哋過往一年嘅外訪行程同開支，唯獨特首辦只能提供到截至去年6月嘅資料。特首辦發言人當時強調佢哋只會季度更新一次特首外訪詳情，特首辦前日終於上載特首梁振英（CY）去年7至9月嘅外訪資料，Emily發現，CY「內交」住宿終於無畀人「包起」。


舊年上半年住宿有贊助

Emily上次發現CY舊年上半年5次「內交」中，次次都有住宿贊助，但特首辦唔肯講究竟贊助何來。根據特首辦噚日公布嘅最新資料，CY上年9月去貴陽出席泛珠合作與發展論壇時，依然住宿免費，5人同行、兩日一夜一共用咗近3萬蚊。不過，呢個「內交」住宿全包嘅傳說，喺佢同月出訪重慶時終於打破，要畀錢，4個人兩日一夜用咗$32,798，當中酒店住宿用咗約$4000。