紅隧自由行被捕

【明報專訊】除咗跑馬拉松嘅時候，市民會跑入過海隧道之外，原來都會有人鍾意用腳「行過海」。早前就有網民拍到喺今個月3號，有個女士喺紅磡隧道入面、馬路旁嘅石壆行走，仲將相片放上網，引起網民熱烈討論。


Emily好奇之下，早前向紅隧查詢，紅隧噚日確認真有其事，行入去嘅係一名內地自由行旅客，紅隧隧道經理話，個女士喺紅隧收費廣場巴士站，無理會隧道放置嘅警告指示牌，徒步入咗隧道行去香港方向。隧道職員發現之後，即刻用巡邏車將個女人送去檢查站，報警將佢拉咗喇。


定罪可罰5000元囚6月

紅隧話，該女士已涉嫌觸犯行車隧道（政府）規例368A，第二部分9（2）條，即任何人未經許可不得徒步進入任何隧道區，一經定罪，最高會被罰款5000蚊同監禁6個月。而包括今次在內，2010年至今已共有4次同類事件。咁當然若遇到緊急情况，即係好似火警咁，需要由隧道職員陪同帶領下離開時，就唔算係犯法。