陳光標慘食《紐時》檸檬

【明報專訊】經常與「做騷」聯埋一齊嘅「中國首善」陳光標（圖），近日因一句「寧傾家蕩產，都要收購紐約時報」，再次成功吸引大眾目光。不過，美國傳媒就報道，日前專程飛到美國計劃同紐時傾收購嘅陳光標，卻慘被拒諸門外。陳光標已經唔係第一次食檸檬。早前文學大師莫言獲諾貝爾獎，佢就一廂情願想送莫言一幢價值5000萬嘅獨立屋，但就被莫言用一句「無功不受祿」婉拒。再之前，佢欲赴台灣某大學演講，宣揚行善理念，又被當地移民署否決。


今次陳光標自爆同一位香港富豪聯手，出價10億美元收購紐時，大家對呢件事都唔太上心，可能大家都明白，標哥每有勁爆事件，重點都唔係最終能否達成，而係要提醒大家，陳光標永遠唔會被大眾遺忘。據內地傳媒講，陳光標派出來嘅卡片上面赫然印有「中國最具影響力人物、中國首善、中國最具號召力慈善家」諸多頭銜。


順便拜訪《華爾街日報》

不過，標哥似乎已經習慣咗大家嘅冷嘲熱諷，佢噚日接受美國當地中文電視採訪時就話，買唔到紐時唔緊要，佢準備順便拜訪一下《華爾街日報》，「看看《華爾街日報》能不能賣。」睇嚟標哥唔介意食多一次閉門羹喎。


email: piano@mingpao.com

[小琴密語]