助弱勢建議書 粵劇解退休男心結

【明報專訊】李嘉誠基金會同社會服務聯會、聖雅各福群會合推《愛心進行曲》計劃，收集到360份由一班前線社工提交嘅建議書，例如用戲劇治療幫助退休男士解開心結、逢星期日陪獨居殘障人士買餸煮飯等，開放畀全港社工同市民投票，得票最高嘅90個項目就會有10萬蚊資助推行。社聯前行政總裁方敏生話，入選嘅項目唔止要有創意，仲要令社會留意到一班被遺忘而需要幫助嘅弱勢社群。


最多like資助加碼 明截止

本身係註冊社工嘅方敏生今次都有投票，最印象深刻係有唔少建議書，關顧到社會上少人認識而又有需要幫助嘅社群，例如一個叫《劉關張下崗查篤撐》嘅項目，畀一眾退休男士透過飾演粵劇人物，探討退休生活嘅可能性；又有項目透過聘請專業營養師，重新設計一啲「精緻軟餐」，畀吞嚥困難者重拾進食嘅樂趣。


不過，有部分現今服務已經覆蓋到嘅項目或者對象，就比較難吸引佢落手投票。今次計劃已經收到超過2500名社工投選，市民都撳咗37,000個「like」，最後贏到最多「like」嘅20個項目，資助額仲會加碼去到20萬。投票日期聽日就截止，要「like」就快，結果會喺下星期三公布。


■投票可瀏覽﹕www.lovehkyourway.org