商務2013暢銷榜 本土題材書受歡迎

【明報專訊】新一年伊始，各書商開始回顧去年成績，商務印書館噚日公布旗下21間門市過去一年圖書銷情，其董事總經理葉佩珠話，今年中文暢銷書排名榜特別將非小說類書細分為「人文」同「樂活」兩類，認為從中更能反映本地讀者所思所想，如人文類頭20名所見，6本本土題材書榜上有名，如《世界中心的貧民窟：香港重慶大廈》排第8，之前內容有刪減爭議嘅《香港簡史》排14。佢提到，回歸後多咗出版跟香港人身分認同有關書籍，研究本港地區同市井故事，而呢類題材嘅書頗受讀者歡迎。


頭20本人文書 6本講本土

至於人文類最好賣嘅書就係多次再版、共售出近萬本嘅《讀圖識中國》。小說類中，就由村上春樹新作《沒有色彩的多崎作和他的巡禮之年》奪冠，賣成近5000本，緊隨第三就係熱爆網絡、高登巴打Mr.Pizza嘅《那夜凌晨，我坐上了旺角開往大埔的紅van》下集。不過，葉佩珠話舊年本地出版社嘅出書種類，其實比前年微跌一成，呼籲業界關注狀况。