施政報告快來曾鈺成提議員檢點

【明報專訊】特首梁振英下周發表任內第二份《施政報告》，立法會主席曾鈺成噚日透過秘書處發信，話要提醒議員注意喺立法會會議中嘅言行。人民力量陳志全（慢必）認為曾主席只係想擺一個姿態，主席可能係因為受到建制派壓力，例如政務司長林鄭月娥頻頻發信投訴議員，先有呢個舉動咁話。


曾主席喺信中話，議員若使用冒犯性、侮辱性同不適宜喺議會使用嘅言語，主席就會要求議員收回言論，或停止阻礙會議嘅行為。如果議員拒絕，主席可視為行為極不檢點，根據《議事規則》命令有關議員退席。佢話對議員喺上年10月特首答問會嘅言辭表示關注，已回覆當時就呢件事寫信畀佢嘅黃毓民，話佢用呢啲言辭，係濫用議員言論自由同法律豁免權。


慢必話，如果佢哋真係要羞辱官員，過去、現在、未來都會做，政策唔掂自然要唔同方式表達。佢哋略略傾過《施政報告》時策略，或者會帶「路福西」公仔入場，但未有最後定案喎。