新聞類別
財經
詳情#
【明報專訊】好多人都想結婚前買層樓，安居樂業，但好少有人調轉嚟諗，將離婚同置業聯想埋一齊。香港大學經濟學講座教授王于漸就將佢化為實際理論，仲有數據輔助，小琴噚日真係大開眼界。
離婚比率高 住屋需求自然高
話說喺中總論壇，王教授就話，政府一直低估住屋需求，唔係因為無留意到結婚數字，而係無留意到離婚同單身人士嘅數字。王教授話，原來香港嘅離婚人口比率好高，平均每1000人就有2.9個人離婚，對比中國、日本甚至歐洲都高，只輸畀美國嘅3.6個。單身人士咁多，住屋需求就自然高。
樓價愈升 租戶業主離婚率差距愈大
但點解會有咁多人離婚？原來又同住屋有關，係個惡性循環。王教授話離婚率最高嘅係私人住宅租戶，其次係公屋租戶，反而業主嘅離婚率，低過租戶五至六成。佢仲話，喺八、九十年代，租戶同業主離婚率嘅差距只有15％，隨着樓價上升，差距就一直擴大，「無論真普選定假普選都好，只要大家有自置物業，社會先唔會分化」。
不過，佢唔覺得政府嘅辣招可以達到更多人置業嘅目的，「天要落雨，你可以擔遮，但唔可以叫停場雨」。佢認為，問題在於供不應求，增加供應先最重要。
email: piano@mingpao.com
[小琴密語]
回應 (0)
