傳曾試探駐軍 南早緊張調查

【明報專訊】早排兩度發生擅闖駐港解放軍總部事件，國務院港澳辦出聲譴責，不過，內地《南方週末》日前爆料話，原來早2003年3月17日，已經有人惡搞駐港解放軍，話說有個外籍人士喺中環軍營連番試探解放軍，自稱係《南華早報》記者，想睇吓駐軍嘅作風啫。《南華早報》得悉呢個報道好緊張，即刻問番啲做咗10年以上嘅同事，但係無人對呢個採訪安排有印象，究竟嗰個「外籍人士」係咪真係《南早》記者，至今係一個謎。


外籍人士送禮邀約食檸檬

據《南方週末》報道，駐港部隊法律處嘅資料顯示，喺2003年，有個外籍人士要求見連隊幹部，當時由值勤嘅副連長汪衛華接待，外籍人士遞上名片，邀請佢去飲咖啡同食飯，但汪衛華拒絕。第二日，外籍人士又到中環軍營，送咗《壹週刊》畀哨兵，但哨兵退回雜誌。第三日，外籍人士同哨兵講想買駐軍軍旗，仲拎咗一疊美金，但都係食檸檬。最後外籍人士話自己係《南早》記者，之前只係想試探駐軍嘅作風。


南早：搵唔到相關採訪安排

Emily問過駐港解放軍，對方無回應。《南早》就同Emily講，睇完呢個報道都覺得好奇怪，問番做咗10年以上嘅同事，大家無印象有呢種採訪建議，《南早》亦無報道過類似內容，而且呢個外籍人士有啲行為已經係行賄，《南早》堅持採訪係要公平公正同建基於事實。