傳媒關注政改 霍啓剛驚訝

【明報專訊】香港青年聯會喺1月2日至7日隨機抽樣600多個18至39歲香港青年，問佢哋認為今年《施政報告》應該重點處理啲乜嘢，聯會主席霍啟剛噚日公布結果。調查結果發現，房屋、政制同社會福利，成為青年人首3個關注議題，分別有40.3%、14.4%同11.5%受訪者認為政府應重點處理，不過霍公子噚日對政改問題就好避忌。


調查：青年最關心房屋政制社福

Emily發現，原來霍公子上周六先以聯會主席身分去完立法會政制事務委員會公聽會發言。霍公子話，星期六係佢第一次去立法會發言，但佢一早做好準備，所以唔緊張。Emily睇番霍公子當日嘅發言稿，立場相當鮮明，難得噚日港聞、娛樂記者聚首一堂，但霍公子就不欲再多談政改，而記招重點就放喺解決青年人學業、就業同置業問題。霍公子話聯會成員有限，兼顧唔到咁多個研究範疇，仲好驚訝咁問，點解傳媒會咁關注政改問題喎！