謝志峰秒殺阿叔妓女論

【明報專訊】香港電台節目《城市論壇》一向火藥味濃，身經百戰嘅主持謝志峰EQ好高，就算「維園阿伯」手持大聲公喺場外爆粗，佢都會心平氣和勸佢哋細聲啲，但噚日有現場觀眾只係講咗一句說話，謝志峰就即時趕佢出場。


謝：又唔見你對住阿媽講？

話說噚日節目內容討論新聞自由，到第三節尾聲，輪到佛教何南金中學一名女學生發言，話今年討論政改，對香港好關鍵，擔心《明報》換總編輯會令新聞自由受損。


該名女學生講完，在場一個戴住副黑超嘅阿叔即向女生高叫「我懷疑你做雞呀」，唔單止喺直播節目出咗街，令在場人士嘩然，呢個阿叔仲走上前與謝志峰理論，堅持無錯，令謝志峰忍唔住駁佢，「又唔見你對住你阿媽咁講？」即時「秒殺」阿叔，並趕佢出場，博得在場觀眾如雷掌聲。


謝志峰話趕完阿叔出場後，仍然有人挑戰佢，佢提議不如問現場觀眾，香港回歸後嘅新聞自由多咗定少咗，於是佢即興喺電視熒光幕前面做咗呢個小民調，結果約10人舉手，話新聞自由多咗；至於舉手認同新聞自由少咗嘅觀眾，至少有幾十人，謝志峰就話，粗略點算大約係1比3，即時令呢班小眾收聲，到節目完結都唔敢再挑戰主持。