升中履歷宜放深刻活動

【明報專訊】中學自行收生階段今個月21號截止，香港明愛噚日搞咗個升中講座同面試工作坊，有150個家長同學生參加。註冊社工陳偉傑話畀Emily知，唔少家長為咗送仔女入心儀學校，都會幫佢哋準備「成呎厚嘅履歷表」，不過，原來portfolio唔係愈厚愈好，而係要搵一啲仔女有深刻印象或有意義嘅活動，如果唔係，當考官問「你覺得參加個活動學到咩？」，但阿仔阿女原來已唔記得參加過呢個活動，到時就口啞啞喇。


面試通常分個人面試同小組討論兩部分。陳偉傑話，唔少學生小動作多多，例如將左右腳分別蹺住兩邊椅腳，另一個面試通病係信心不足，連自己嘅強弱項都搞唔清。小組討論方面，有學生成日心急搶住發言，又唔能夠包容其他人嘅睇法，佢建議學生多啲聽人意見，唔好次次要自己拗贏。


學生通病：小動作多要拗贏

小組討論不時涉及時事，陳偉傑話學校主要唔係考學生知唔知事件嘅最新發展，而係要考學生有無多角度思考，建議佢哋多聽多睇不同意見，增廣見聞。