剝褲遊港鐵想帶來歡樂

【明報專訊】噚日喺港鐵見到有班人唔著褲，正當Emily諗緊唔知好唔好影幅相擺上網，再過去提佢哋著番條褲時，先發現有人搞緊「No Pants Subway Ride」。其實呢個活動2002年喺紐約發起，起初得7個人玩，至今已有超過60個城市響應，香港係第二年搞。發起活動嘅組織Improv Everywhere話，呢個活動純粹惡搞，想帶畀其他人歡樂。


Emily見到大概30至40人喺中環IFC集合，有男有女，大部分係外籍人士。佢哋分5組，一齊喺中環上港鐵唔同車卡，然後每個站都有部分人落車、喺月台除褲，再上下一班車。就係咁，佢哋若無其事咁唔著面褲，「上身蒸鬆糕，下身賣涼粉」，遊咗一日港鐵河。有人話參加都係湊熱鬧貪得意，但就有唔少人投以奇異目光。


Improv Everywhere叫啲記者唔好掛住影相，最好參加埋一份，仲話﹕「If you're not here to take your pants off, you're in the wrong place（如果你唔除褲，你就去錯地方）。」