田二少搞掂超細廁所

【明報專訊】新民黨立法會議員田北辰「田二少」噚日同Emily講，經過大半年時間，終於成功爭取房屋署擴闊擁有號稱「全港公屋最細廁所」嘅屯門寶田邨公屋單位廁所。今日佢會同埋其他立法會房屋事務委員會議員實地視察，希望到時可以見到擴闊後嘅廁所，同埋收到房署提交具體改建方案。


政府接納建議擴闊廁所

田二少話，寶田邨本來係中轉屋，廁所細少少都算，但轉做公屋後，廁所細到轉唔到身就唔人道，所以大半年前收到居民投訴後覺得好氣頂，將件事拎上立法會房屋事務委員會傾，獲得其他議員支持，通過動議齊齊向政府施壓，而政府最終亦從善如流，接納建議擴闊廁所。


不過改建廁所將影響現有居民，田二少話最近去寶田邨家訪，大部分居民希望房署可安排臨時安置單位，畀居民搬出暫住兩至三個星期，騰空單位畀房署擴建，希望今日房署交代安置居民方案啦。