人代王庭聰嫁女 梁錦松滿場飛

【明報專訊】港區人大代表王庭聰嫁女，囡囡去年底已註冊，前晚就喺洲際酒店補擺喜酒，唔少政界人士都有出席，其中被視為有意競逐2017年特首選舉嘅前財政司長梁錦松，就同老婆伏明霞坐主家席，食足成晚之餘仲滿場飛，同各路賓客打招呼。咁畀面除咗因為佢同王庭聰都為「小母牛」出錢出力成為老友外，會唔會都鋪緊路選特首呢？


戴德豐賣廣告叫大家食紫菜

王庭聰係人代，又係福建人，噚日唔少人代、政協巨頭現身，好似政協常委林樹哲、戴德豐、廣東社團總會主席王國強、民建聯主席譚耀宗咁，最搞笑係各社團巨頭上台恭賀一對新人早生貴子、幸福快樂時，戴德豐就選擇幫公司賣廣告，叫大家食多啲四洲紫菜！

王庭聰：自己唱歌好過講嘢

主人家王庭聰致辭時就話自己「唱歌好過講嘢」，晚宴中段仲拉埋成班人大代表，好似愛國歌手張明敏、譚惠珠、馬豪輝、葉國謙等上台，由王庭聰同張明敏帶唱《愛拼才會贏》，掀起高潮，兩人的確唱得唔錯，仲笑言打算出唱片