百度踩Google 在華不接地氣

【明報專訊】噚日百度CEO、新首富李彥宏係亞洲金融論壇，獲貴賓待遇，單獨一人上「中國機遇」討論環節。佢就即場踩Google同一眾外國IT公司「不接地氣」（唔熟民情、遠離民情咁解），唔識起中國名。


他就舉例Google改個名叫谷歌，話咁有農村味，以為中國人豐收了就高興，但是網民有幾多係農民呢。


指谷歌太有農村味

李彥宏仲好自信話中國IT企業已經擺脫咗C2C（Copy to China）嘅模式，家好多創新，例如百度貼吧、騰訊微信。百度自己開發嘅中文搜索仲可以理解到，謝霆鋒個仔是邊個，同謝霆鋒係邊個嘅仔，係不同問題，畀嘅答案都不同。


「幾乎所有行業 都受互聯網衝擊」

李彥宏放話，幾乎中國所有行業，都要受到互聯網衝擊。不僅僅係金融、旅遊，仲有汽車，未來仲有醫療、教育都會受衝擊。呢個機會係美國冇，中國先有。因為呢啲行業嘅中國公司未有真正市場化訓練過。唔怪得主持嘅恒隆地產（0101）老細陳啓宗都驚驚地話，隨時顛覆埋地產生意。


email: piano@mingpao.com

[小琴密語]