卓永興任AO招聘會主席

【明報專訊】政府公布新一輪高官「音樂椅」調動，多名屬甲級政務官嘅資深AO調位，現任香港駐美國總經濟貿易專員、53歲嘅唐智強，3月3日會調返香港做勞工處長，而現任處長卓永興，就會出任2014年政務主任招聘委員會主席，呢份短期工係幫政府揀蟀請AO。現任食環署長、48歲嘅梁卓文，就會調去美國接任駐美國總經濟貿易專員。3個AO今次都屬平調。


食環署長未有接任人選

今次嘅人事調動仍有一啲窿窿留白，如食環署長一職未公布接任人選，而卓永興嘅新崗位，其實只係幾個月嘅短期工作，請完AO後又要搵位走。有政府中人就話，政務主任招聘委員會主席一般會搵就快退休嘅AO做，但可能近期未有合適人士，所以先搵卓永興頂呢個位。


除咗AO調位，政府技術部門都有人事升遷。現任庫務署副署長蕭文達，將於本月21日接替黃徐玉娟出任庫務署長。同日，黃徐玉娟喺服務政府38年後開始離職前休假。


技術部門有人事升遷

另外，現任機場擴建工程統籌辦公室總監鍾錦華，將於2月3日起接替陳志超出任渠務署長，陳志超喺服務政府34年後開始退休前休假。