馬丁願收劉進圖為徒

【明報專訊】民主黨創黨主席兼資深大律師李柱銘（馬丁），噚日喺其《明報》副刊專欄「開天窗」，只寫上標題「黑手蓋日月 本報頓失明」，以示不滿明報換總編輯。李柱銘喺商台節目透露，曾發短訊建議做過佢助理嘅《明報》總編輯劉進圖，改行去做大律師，話自己仲可以收徒弟咁話。


李「開天窗」 劉：尊重評論自由

明報總編輯劉進圖就回應話，專欄作者以「開天窗」形式，表達對社會事件嘅關注或不滿係「罕見做法」，呢個係個別作者選擇，不代表編輯部立場，而明報編輯部向來尊重專欄作者嘅評論自由，只要建基於事實嘅評論、係關乎公共利益嘅事情，一般會尊重作者取向；如果事件涉及明報本身，明報會以適當方式表明報社立場。


李柱銘向來同數名大律師為明報副刊專欄「法政隨筆」輪流執筆，周二馬丁就「開天窗」。佢噚日接受商台訪問時話，「稿」係上周六（11日）交嘅，認為明報管理層對換總編輯人選嘅理由荒謬。佢話自己會繼續寫專欄，但下次唔會再開天窗，而會「直接鬧」，仲會一直寫到「被抽起」為止。


馬丁讚細心勤力 劉收短訊感動

馬丁又提到自己同劉進圖關係良好，第一次見時劉進圖仲係港大學生，佢形容劉好細心、勤力、文筆好，後來仲做埋馬丁助理。馬丁話，劉進圖被明報調職後，自己發過一個短訊畀佢，建議佢不如換過另一份工作，如做大律師，仲話自己可以收佢做徒弟，而據佢引述劉進圖回覆，就話喺收到咁多慰問中，馬丁嘅令佢最感動。劉進圖噚日就同Emily講，感謝李柱銘先生嘅關心。