李小加：望2020年「一國一制」

【明報專訊】港交所行政總裁李小加言論一向出位，噚日又有驚人金句。話說喺亞洲金融論壇嘅早餐會上，主持人問到大家對2020年有咩願景，小加突然話，希望到時已經可以做到一國一制。


講經濟 非講政治

小琴當堂嚇一跳，不過原來得啖笑，原來小加講嘅係經濟上一國一制。佢嘅意思係，到咗2020年，相信內地經濟已經全面開放，制度上同香港已經一樣，所以叫做一國一制。


由於今年係政治敏感年，又佔中又政改諮詢，佢呢個時候「講呢啲」，即使佢已經解釋咗，大家依然一身冷汗，早餐會完咗後大家繼續圍住小加追問。小加再次解釋，講嘅係利率自由化同自貿區等改革會令中國經濟制度更貼近國際，強調同政治無關，仲話自己唔識政治。小加，下次你爆肚前真係要諗清楚，唔好再惹誤會呀。


email: piano@mingpao.com

[小琴密語]