立會緊急通道設限

【明報專訊】舊年立法會審議引用《權力及特權法》調查免費電視牌照事件後，有議員利用立法會大樓和政府總部之間嘅緊急通道開車離開，新民主同盟議員范國威話咁做唔啱，要求用混凝土將「秘密通道」永久封閉。立法會行政管理委員會噚日通過指引，為使用緊急通道設限，日後議員若要用緊急通道，就唔能夠再「唔聲唔聲」嘞！


僅兩情况下可使用

新指引講到明緊急通道只係用作備用，只有兩個情况下先可以使用﹕一係遇上好特別嘅安全情况，由保安主管決定使用；另一係立法會被圍堵、有議員要求使用。兩個情况下，保安組都要口頭通知立法會主席，同埋喺之後書面通知行管會。


立法會主席曾鈺成噚日強調，開緊急通道只能係「保安理由」，若本身其他路行得通，只係議員唔想見傳媒，好明顯就唔屬「保安理由」，而大原則係議員同出席會議嘅人都要可以暢通無阻地出席會議。


另外，立法會好快會將手語翻譯服務，推展至多個小組委員會，秘書處亦將發信提醒議員注意日後講嘢唔好太快或語焉不詳，否則手語翻譯好難做喎。