梁家騮「處男問」未諗到

【明報專訊】特首梁振英（CY）今日發表任內第二份施政報告，唔少團體打算去立法會示威。「青年拒當樓奴」一班成員噚日就喺政總通宵靜坐「迎接」新施政報告，社民連就預備咗一個「密底算盤」送畀CY，諷刺對方算死草，有嘢益富豪都唔益基層市民。民主黨嘅大型「路姆西」（路福西）將再度登場，叫CY唔好再將政策一拖再拖，令施政報告淪為「拖政報告」。


CY今晨11點喺立會讀完施政報告，明早10點半會再去立法會答問大會，屆時邊個有機會提問呢？按慣例，以「處子之身」從未在答問大會提問嘅「怪醫」梁家騮可優先提問，但怪醫同Emily講，佢未諗到問咩問題，聽日會否獻出第一次，仲要睇吓CY今日提乜嘢醫療政策後再諗諗，費事CY可以用幾分鐘時間，問咩都答委員會研究緊就「hea」過問題！

工黨李卓人話，CY喺上年施政報告將房屋政策講得七七八八，相信今次唔會有咩政策新猷。CY今日下午兩點半亦會開記者會，晚上7點接受電子傳媒訪問，聽日8點上電台聯合烽煙節目。