42大馬撰稿人港台工會撐明報員工

【明報專訊】《明報》母公司世華集團諗住搵大馬人鍾天祥做明報總編輯，引來員工嘩然，連來自馬來西亞嘅42名自由撰稿人，都發表聯署聲明越洋聲援明報員工。


點解呢42名自由撰稿人咁緊張？事關佢哋喺2001年經歷過「南洋報變事件」，佢哋話大馬媒體集團同跨地域政經力量關係密切，削弱媒體監督政府嘅力量，強化反智與犬儒氣氛，擔心明報步《南洋商報》後塵。


聯署聲明話，馬來西亞因為媒體環境惡化而持續付出代價，「我們不願再見香港社會也遭遇同樣苦果」。


關注組改周一會管理層

另外，港台工會發聲明聲援明報，話憂慮香港新聞自由進一步被蠶食，所以佢哋會響應記協嘅「一人一信」行動，要求明報管理層承諾編採獨立，同埋今日會着黑衫表達對新聞自由、編輯自主嘅支持。同樣搞黑衣行動嘅，仲有壹傳媒工會，佢哋今日亦會喺蘋果大樓發起集會，以黑衣照表達對明報員工嘅支持。另外，明報員工關注組話，由於需時收集同事意見，與公司管理層商討後，原定今日嘅會議改於下周一（20日）舉行。