法師養「非洲孤兒」供書教武

【明報專訊】來自台灣嘅慧禮法師，2004年開始喺非洲國家馬拉維創辦「阿彌陀佛關懷中心」，收養當地孤兒，家已經喺3個非洲國家收養咗超過3000個孤兒。除照顧佢哋外，孤兒院仲會教小朋友講普通話、學武功同念佛經。上星期，「和尚爸爸」慧禮法師同佢10多個「仔女」嚟香港舉行慈善表演，呢班黑人小朋友獻唱中文歌，又大耍功夫，令Emily大開眼界。


台法師非洲收3000孤兒

13歲嘅青孝嚟自非洲斯威士蘭，佢話兩年前被送入孤兒院前其實好驚，因為當地有一個傳說，話中國人開孤兒院係為咗捉啲細路仔嚟食。慧禮法師解釋話，因為佢開孤兒院嘅地方都比較落後，當地人唔相信有中國人會收養孤兒咁善良，所以第一間孤兒院啱啱起好嗰陣，啲部落首領都以為法師會吃人，唔肯將孤兒交畀佢，法師花咗好多時間先說服到啲首領。


初時被當壞人 會「吃細路」

16歲嘅萬月嚟自馬拉維，8年前佢父母車禍過身後就同阿姨一齊生活，因為窮，佢每日只有一碗玉米糊食，亦無機會讀書，每日要去農田幫手。6年前部落首領送佢入去孤兒院之後，佢就冇再捱餓，仲可以讀書接受教育，「每天要念經、練功夫和上課，那些有父母的孩子都羨慕我」。萬月話佢嘅夢想係做總統或者醫生，因為國家太窮、太多人病死。


慧禮法師認為，只要有教育機會，呢班非洲小朋友唔比其他任何地方孩子差，佢希望孤兒院嘅小朋友受過教育之後，成為「新一代非洲人」，改變非洲大陸落後嘅現狀。