EQ盧偉國 攝位講「成功爭取」

【明報專訊】議員為咗爭取曝光，宣布成功爭取，究竟可以去到幾盡？噚日民建聯葛珮帆（ＥＱ，右）、經民聯盧偉國（左）為咗爭取政府設立科技局，《施政報告》都未宣布，兩人就率先拎住個大牌要求回應有關科技局訴求。特首梁振英讀完施政報告後，佢哋又立即衝去做回應，話自己成功爭取。


其實立法會一早準備咗記者室，等唔同黨派可以喺施政報告讀完後慢慢排隊回應，等記者提問，至於會議廳外嘅「咪兜」，通常就畀官員、行政會議成員回應，噚日政務司長林鄭月娥、財政司長曾俊華都先後行埋咪兜，令行政會議召集人林煥光、成員鄭耀棠、廖長城等要喺後面排隊回應。


不過，葛珮帆同盧偉國兩人攝得好快，見到曾俊華行開後，立即走埋去咪兜前宣布成功爭取科技局，搞到成班行會成員一等再等，林煥光亦面露無奈咁話「等吓囉」。其實，爭取成立科技局，又豈止某一黨派議員嘅功勞呢。