施政報告3句點題 學者讚好

【明報專訊】《2014年施政報告》嘅主題唔再用四字詞語，反而用上三句話代替，有網民就話唔順口，彈啲中文唔好；不過，教院中文系副教授湯浩堅就大讚今年嘅主題寫得唔錯，比2013年嘅「穩中求變 務實為民」更加具體。


網民話唔順口 中文差

今年施政報告以「讓有需要的得到支援 讓年青的各展所長 讓香港得以發揮」為主題。湯教授一睇今年條題，就知道報告內容講乜嘢，認為簡單易明「寫得唔錯」。佢亦分享寫呢種標題嘅兩個要點，分別係要「簡潔易明」同「提綱挈領」。


CY講古﹕青年按樓闖廣西

特首梁振英（CY）今年喺施政報告入面分享咗3個故事，當中有兩個都係想同青年人講行行出狀元嘅道理。CY話，認識一名青年，將物業加按套現，10年前去廣西闖天下，今日擁有一家每年營業額超過1億元嘅食品供應鏈企業。CY鼓勵大家要敢闖敢搏，把握國內外機遇。


CY又話之前去咗中華廚藝學院祝捷會，祝賀香港廚師隊喺國際西餐廚藝大賽勇奪全場總冠軍，特首鼓勵大家，喺職業培訓期間努力學習，最終都可以實踐夢想。CY又介紹施政報告封面，有9格相片，全部都以年輕人做主角，當中只有一人係戴四方帽（圖右上），其他都係不同行業嘅人，用意好明顯啦。


不過CY除咗鼓勵大家，都明白政府要為年輕人做多啲事，佢話上月喺旺角行街時，有一對夫婦同佢講因為間屋太細，唔可以追多個小朋友，令佢下定決心要解決房屋短缺問題。