馮煒光處男記招蝦碌多

【明報專訊】新聞統籌專員馮煒光上任一個月以嚟都好低調，噚日《2014年施政報告》出爐，佢終於走出台前，包括主持記者會，不過佢嘅處男作就有唔少蝦碌事。話說馮專員一開始就聲明記者會只得45分鐘，又收集晒記者嘅卡片，方便點記者提問，不過，當特首梁振英（CY）講完開場白，佢已經點咗「藍色衫嗰位」（鳳凰記者），但梁振英突然主動話要拎住施政報告影相，搞到場面尷尬，唯有影晒相後先再開始提問環節，兩人似乎默契未夠。


頻望表撳電話 想早完場

隨後記者會上，唔知馮煒光係咪要嚴格控制時間，佢不時睇表，甚至喺CY答問題時，至少兩度拎手提電話出嚟撳，唔知佢喺主持記者會時有咩重要人搵佢，令佢非看不可呢？佢仲一度想提早完場，宣布記招完結，令在場行家隨即起哄，投訴「未夠鐘」，最終要CY幫佢解圍，肯主動話答多兩條問題。


鳳凰衛視兩獲提問

馮煒光叫記者提問，大部分時間都係講唔出記者名，部分行家被稱呼為「企喺度嗰個」、「皮褸嗰個」咁，結果唔少主流傳媒都無得提問，包括《明報》、《信報》、《星島日報》、有線電視、now新聞台等，但亦有傳媒獲厚待，好似TVB、港台同鳳凰衞視，都分別有兩個記者成功提問。