議員寫揮春「好危險」被收檔

【明報專訊】臨近新春，唔少政黨同區議員都幫市民寫揮春，新民主同盟區議員丘文俊就遇到不愉快事件，話說佢前日下晝4點喺領匯下沙田沙角邨街市對外空地擺檔，幫街坊寫大字，但約一個鐘之後，有兩名領匯商場經理同幾個保安出現要求中止活動，仲搬走佢哋攤檔。


擺沙角邨五六年從未被阻

丘文俊話，當時其中一個男經理聲稱「寫揮春活動好危險」，但就無解釋點解咁危險。丘文俊喺沙角邨寫新年揮春已經有5、6年，無一次被人趕走，本月初亦擺過一次檔，覺得今次領匯好霸道。


領匯回應話，鑑於有訪客反映活動人龍對街市門外通道同入口造成阻塞，管理人員先勸喻活動負責人配合，保持通道暢通，強調無郁過活動任何物品。領匯仲話，沙角邨街市做緊提升工程，早前已經書面回覆丘文俊拒絕擺檔嘅原因。


余若薇：路邊擺檔唔使申請

其實寫揮春係開心事，好似公民黨余若薇（Audrey）今年就要每日跑兩場，已經先後去過北角、柴灣同大角嘴等區，Audrey話，通常會喺路邊擺街站，唔需要特別申請，亦無乜試過被人阻攔。


迎馬年，Audrey話今年熱門字句就有「龍馬精神」、「馬到功成」等；同樣寫得一手靚字嘅立法會主席曾鈺成，之前亦有去灣仔鵝頸街市擺檔寫揮春。