元秋送克勤仔底衫

【明報專訊】有政壇「元秋」外號嘅民建聯副主席蔣麗芸雖然平時好強悍，喺立法會聲大大，但私底下都有柔情細心嘅一面。近日天氣寒冷，一早一晚外出著少件衫都凍到入心，上星期佢黨友陳克勤外套都唔著就行去立法會會議室開會，搞到自己打晒冷震。元秋見到黨友咁，當然關心一下，仲介紹對方著保暖、透氣嘅底衫。


克勤「超感動」 fb曬幸福

但元秋「介紹」都未夠，唔知佢係咪驚克勤仔「唔聽話」唔肯去買保暖底衫呢，結果元秋親自去買咗件雞仔嘜牌嘅底衫送畀克勤仔，仲要拎埋去對方辦公室畀佢，克勤仔噚日喺facebook上載相片曬幸福，表明對元秋送暖「超感動」。據聞呢件底衫售價都超過400蚊，唔係個個捨得買，不過相信對元秋嚟講絕對唔係乜嘢錢。


元秋嘅柔情唔止送畀克勤，呢件保暖底衫，佢老公梁海明都有一件，見到克勤仔喺facebook張相，梁海明忍唔住留言話﹕「好在有你，我也收到。」