新聞類別
財經
詳情#
【明報專訊】「衝上雲霄II」熱播，「Cool魔」張智霖人氣爆燈，不但名利雙收，仲帶挈贊助商港航舊年賣多三成飛，噚日港航高層就話，要好好多謝部電視劇，吸引咗好多年輕旅客喔。舊年條數省鏡，簡直係最好嘅新年禮物啦。
3月新增3航線
港航商務總監李殿春同小琴講，「衝上雲霄II」播出後，港航啲飛大賣。除咗總客量大增，兩艙生意都喺舊年內地反腐等不利因素下，依然有得升，其中商務艙收益大升五成。港航打鐵趁熱，今年新年前大促銷提前開始，今個月13至17號合共推出咗10萬張優惠機票，覆蓋大部分航線。3月起再新增胡志明市、吉隆坡、濟州島等新航點，又增加港人喜愛嘅冲繩等地航班。
港航姊妹公司香港快運舊年轉型廉航，港航副總裁孫劍峰就話快運轉型後，港航可以專注吸引中高檔客。噚日介紹咗今年新推出嘅機上購物清單，小琴發現新增咗Gucci、Johnnie Walker呢兩個更高端嘅品牌。孫劍峰又介紹，已經喺3架飛機中安裝機上WiFi，今年試行中，如果順利，會喺其他飛機鋪開呢項服務，話希望呢啲升級服務可以吸引大家多多幫襯喔。
email: [email protected]
[小琴密語]
回應 (0)
