香港本土自製利市封宣傳

【明報專訊】由公民黨毛孟靜 、新民主同盟范國威牽頭嘅「香港本土」，一直關注赤化問題，臨近新年，佢哋印製2000個寫有「香港本土」嘅利巿封派街坊做宣傳。不過，毛孟靜強調，其實佢哋支持環保，鼓勵大家用舊利巿封，所以印製數量不多。


電視字幕用內地詞感擔憂

佢哋話，雖然過去一年好努力搞本土議題，仲話覺得香港情况每况愈下，又話好擔心新聞自由，因為唔少傳媒老闆都有紅色、中資背景咁話。佢哋形容自己係「溫和本土派」，強調唔會用激烈字眼去講本土議題，希望大家都支持。范國威就舉例話，最近有電視劇字幕用晒內地用詞，明明講緊捉迷藏，但字幕就寫「躲貓貓」咁話。


佢哋亦話，關注早前終審法院裁決只需要來港1年就可以申請綜援，聽日將會擺街站做問卷，睇吓市民有咩睇法。


民主派有個聯合聲明，對於蔡耀昌因協助新來港人士訴訟爭取綜援而遭恐嚇，泛民表示憤怒以及尊重和認同法庭判決等立場，共有21個民主派議員簽署，但就唔包括范國威同毛孟靜。