馮煒光下周處男出trip

【明報專訊】特首梁振英又再搞內交，今次目的地係福建，將喺呢個月23號出發。同以往不同，今次政府透過香港福建社團聯會，安排咗10幾個香港學生隨團，新聞稿話要畀佢哋擴闊見識同視野。另一樣值得留意，今次係新聞統籌專員馮煒光上任後首次出trip，唔知佢準備好未？


今次代表團除咗有香港內地經貿合作諮詢委員會成員，仲包括福建省政協香港常委，同埋福建社團聯會代表等。佢哋會先去福州同福建省領導會面，第二日去閩港經貿交流會，參觀福州市城市規劃展示館同特區駐福建聯絡處等。佢當日亦會同福州市領導，以及喺當地工作經商同就學嘅港人會面。


特首其後會去廈門，參觀市內企業以及會晤廈門市領導，25號晚由廈門返港。佢離港期間，由政務司長林鄭月娥署理特首職務。