490萬元威士忌天下第一

【明報專訊】天價紅酒如Lafite港人聽得多，但一山還有一山高，前日蘇富比拍賣行喺香港拍賣咗The Macallan一支6公升嘅蘇格蘭麥芽威士忌，成交價達490萬港元，除番開即係一毫升就盛惠817大元，破咗最貴威士忌嘅健力士世界紀錄之外，亦貴過世上最貴紅酒成倍。


拍賣收益捐港慈善機構

呢支「天下第一威士忌」叫「Imperiale "M" Decanter - Constantine」，由名酒廠The Macallan同法國水晶頂級品牌Lalique合作製成，係酒廠喺庫存20萬桶由1940年至1990年出產嘅威士忌中精選佳品調配而成，只出過4支。而今次係呢個系列第一次拎出嚟公開拍賣，收益撥捐香港慈善機構，拍賣價咁理想，絕對值得鼓掌。


呢支「M」水晶酒瓶Constantine折合價大約63萬美金，翻查健力士世界紀錄，原有世界最貴威士忌紀錄保持者亦係同一酒廠出品，當時賣46萬美元，即係新紀錄高咗約17萬美元，亦比世界最貴紅酒約30萬美元嘅售價高出成33萬美元。佢唔止貴，仲分量十足，有成6公升，所以個樽都有11公斤重，高70厘米，係Lalique製造過最大嘅酒樽。