肥馬﹕佢未過到老婆一關

【明報專訊】商務及經濟發展局前局長馬時亨（肥馬），噚日又去咗民主黨主席劉慧卿主持嘅網台節目《議會內外》做嘉賓。早前有傳聞話肥馬嘅老友、前財政司長梁錦松打算選特首，肥馬喺節目上就大爆佢老友未過到老婆嗰關，所以到家都「未有正面否定同正面答覆」會唔會選特首。


盼擬選特首者組定班子

肥馬喺節目入面話，希望將來有心有力人士出嚟選特首時，最好可以組定班子，至少話畀市民知計劃由咩人擔任3司，等市民有多啲信心。不過，佢都話實際執行可能有難度，因為未必人人都想咁快曝光，加上司長任命權喺中央嗰度，擔心如果中央唔肯任命就唔知點算。


笑住賀卿姐遭點名選特首

對於阿松有意選特首嘅傳聞，佢笑笑口咁話家啲「女士係董事長」，所以男士做事時都要過咗董事長第一關先。講起選特首，肥馬笑住「恭喜」卿姐有幸被前港區人大代表吳康民點名叫佢選特首，卿姐當然即刻耍手擰頭話自己無能力選。