新聞類別
財經
詳情#
【明報專訊】由「富豪御醫」謝德富太太陳曦齡醫生創辦嘅維特健靈，噚日舉辦成立20周年慶祝酒會。雖然維特健靈公司規模唔大，但兩位醫生人面之廣闊較之唔少中資公司都無不及，酒會嘅主禮嘉賓就由久未露面嘅全國政協副主席董建華，同利豐（0494）集團榮譽副主席馮國經擔任，其他政經界嘉賓如雲，同場又有德國體操小王子阮馬斯（Marcel Nguyen）及毛舜筠出席，可謂星光熠熠。
猛人齊賀廿周年
馮國經上台致辭時話，自己對維特健靈十分熟悉，唔單係因為利豐子公司幫維特健靈做咗近20年經銷，佢自己都有用維特健靈嘅產品。佢詳細介紹公司歷史，將主禮嘉賓做得稱晒職，可想佢同兩位醫生交情匪淺。其他到場祝賀嘅政經界名人有廖長城、周一嶽、梁愛詩、梁智鴻等。
作為香港土生土長嘅保健品牌，維特健靈打算上市嘅消息已經傳咗好耐。陳醫生噚日就話，公司不缺錢，上市係長遠目標，所以冇乜嘢可多講。不過，佢就話公司依家喺港澳有33間專門店，今年想喺香港開多10間舖。同時要大舉進軍內地市場，將華南地區做大。而靈芝價格近年升得勁，又打算加價一成。開舖、進軍內地、加價，呢啲都係上市前嘅常規動作，依小琴睇維特健靈上市都唔遠嘍。
email: [email protected]
[小琴密語]
回應 (0)
