韓連山組進師盟睇住民主黨

【明報專訊】政改令到教協內部出現唔同聲音，早幾日教協骨幹成員韓連山（韓sir）等組成「進步教師同盟」（進師盟），派19人參選教協監事會，講到明話擔心教協副會長張文光等民主黨成員對教協影響力太大，影響教協喺政改上嘅取態。Emily知道，「進師盟」宣布成立咗幾日，佢嘅facebook專頁已經有超過1600人like，進師盟於是決定成立「進師之友」吸納更多支持者。進師盟特登喺fb專頁度擺咗條link，只要click入去，留低少少背景資料同聯絡方法，就可以成為進師之友。


另一邊廂，張文光就同陳漢森、潘天賜等教協內嘅民主黨成員，一齊參選理事會。對於進師盟點名話擔心民主黨對教協影響力太大，陳漢森就話唔同意，佢同Emily講，教協理事會所有決定都經過理事討論，一齊拍板，驟眼睇，理事會裏面大部分都唔係民主黨人。不過，佢話如果多啲人想參選監事會鞭策理事會，佢當然歡迎啦。